Jeremiah 52
1ϩⲛ ⲧⲙⲉϩϫⲟⲩⲧ ⲟⲩⲉⲉ ⲛⲣⲟⲙⲡⲉ ⲛⲥⲉⲇⲉⲕⲓⲁⲥ ⲛⲧⲉⲣⲉϥⲣⲣⲣⲟ ⲁⲩⲱ ⲁϥⲣⲣⲣⲟ ⲙⲙⲛⲧⲟⲩⲉ ⲛⲣⲟⲙⲡⲉ ⲁⲩⲱ ⲡⲣⲁⲛ ⲛⲧⲉϥⲙⲙⲁⲁⲩ ⲡⲉ ⲁⲙⲡⲓⲧⲁⲁⲗ ⲧϣⲉⲉⲣⲉ ⲛⲓⲉⲣⲉⲙⲓⲁⲥ ⲡⲉⲃⲟⲗ ϩⲛ ⲗⲟⲃⲉⲛⲁ 2 3 4ⲁⲩⲱ ⲁⲥϣⲱⲡⲉ ϩⲛ ⲧⲙⲉϩⲯⲓⲧ ⲛⲣⲟⲙⲡⲉ ⲛⲧⲉϥⲙⲛⲧⲉⲣⲟ ϩⲙ ⲡⲙⲉϩⲯⲓⲧ ⲛⲉⲃⲟⲧ ⲛⲥⲟⲩⲙⲏⲧ ⲙⲡⲉⲃⲟⲧ ⲁϥⲉⲓ ⲛϭⲓ ⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲙⲛ ⲧⲉϥϭⲟⲙ ⲧⲏⲣⲥ ⲉϫⲛ ⲑⲓⲏⲙ ⲁⲩⲕⲱⲧⲉ ⲉⲣⲟⲥ ⲁⲩⲱ ⲁⲩⲕⲱⲧ ϩⲓⲣⲱⲥ ⲛⲟⲩⲥⲟⲃⲧ ⲛϥⲧⲟⲩ ϣⲓⲙⲉ ⲛⲱⲛⲉ ⲉⲩⲕⲱⲧⲉ 5ⲁⲩⲱ ⲧⲡⲟⲗⲓⲥ ⲁⲩⲁⲣⲃⲉⲥ ⲉϩⲟⲩⲛ ϣⲁ ϩⲣⲁⲓ ⲉⲧⲙⲉϩⲙⲛⲧⲟⲩⲉ ⲛⲣⲟⲙⲡⲉ ⲛⲥⲉⲇⲉⲕⲓⲁⲥ ⲡⲣⲣⲟ 6ⲛⲥⲟⲩⲯⲓⲧ ⲙⲡⲉⲃⲟⲧ ⲁⲩⲱ ⲁϥϭⲙϭⲟⲙ ⲛϭⲓ ⲡⲉϩⲕⲟ ϩⲣⲁⲓ ϩⲛ ⲧⲡⲟⲗⲓⲥ ⲉⲙⲙⲛⲟⲉⲓⲕ ϣⲟⲟⲡ ⲙⲡⲗⲁⲟⲥ ⲙⲡⲕⲁϩ 7ⲁⲩⲱ ⲁⲩϭⲱⲧϩ ⲉⲧⲡⲟⲗⲓⲥ ⲣⲣⲱⲙⲉ ⲧⲏⲣⲟⲩ ⲛⲣⲉϥⲙⲓϣⲉ ⲁⲩⲡⲱⲧ ⲁⲩⲉⲓ ⲉⲃⲟⲗ ϩⲛ ⲧⲡⲟⲗⲓⲥ ⲛⲧⲉⲩϣⲏ ϩⲛ ⲧⲉϩⲓⲏ ⲛⲧⲡⲩⲗⲏ ⲛⲧⲙⲏⲧⲉ ⲙⲡⲥⲟⲃⲧ ⲁⲩⲱ ⲧϫⲟ ⲉⲧϩⲓⲃⲟⲗ ⲉⲧϩⲓⲧⲟⲩⲛ ⲡⲕⲏⲡⲟⲥ ⲙⲡⲣⲣⲟ ⲁⲩⲱ ⲛⲉⲭⲁⲗⲇⲁⲓⲟⲥ ⲉⲩⲕⲧⲏⲩ ⲉⲧⲡⲟⲗⲓⲥ ⲁⲛⲏ ⲃⲱⲕ ϩⲛ ⲧⲉϩⲓⲏ ⲉϩⲣⲁⲓ ⲉⲁⲣⲁⲃⲁ 8ⲁⲥⲡⲱⲧ ⲛϭⲓ ⲧϭⲟⲙ ⲛⲛⲉⲭⲁⲗⲇⲁⲓⲟⲥ ⲛⲥⲁ ⲡⲣⲣⲟ ϩⲓ ⲡⲉⲕⲣⲟ ⲛϩⲓⲉⲣⲓⲭⲱ ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ ⲁⲩϫⲱⲱⲣⲉ ⲉⲃⲟⲗ ⲛⲧⲟⲟⲧϥ 9ⲁⲩϭⲱⲡⲉ ⲙⲡⲣⲣⲟ ⲁⲩⲛⲧϥ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲉϩⲣⲁⲓ ⲉⲇⲁⲃⲗⲁⲑⲁ ⲁⲩⲱ ⲁϥϣⲁϫⲉ ⲛⲙⲙⲁϥ ϩⲛ ⲟⲩϩⲁⲡ 10ⲡⲣⲣⲟ ⲇⲉ ⲛⲧⲃⲁⲃⲩⲗⲱⲛ ⲁϥⲕⲱⲛⲥ ⲛⲛϣⲏⲣⲉ ⲛⲥⲉⲇⲉⲕⲓⲁⲥ ⲙⲡⲉⲙⲧⲟ ⲉⲃⲟⲗ ⲛⲛⲉϥⲃⲁⲗ ⲁⲩⲱ ⲛⲁⲣⲭⲱⲛ ⲧⲏⲣⲟⲩ ⲛⲓⲟⲩⲇⲁ ⲁϥⲕⲟⲛⲥⲟⲩ ϩⲛ ⲇⲉⲃⲗⲁⲑⲁ 11ⲃⲃⲁⲗ ⲇⲉ ⲛⲥⲉⲇⲉⲕⲓⲁⲥ ⲁϥⲁⲁⲩ ⲃⲃⲗⲗⲉ ⲁϥⲥⲟⲛϩϥ ϩⲛ ϩⲉⲛⲡⲉⲇⲉⲥ ⲁϥⲛⲧϥ ⲛϭⲓ ⲡⲣⲣⲟ ⲛⲧⲃⲁⲃⲩⲗⲱⲛ ⲉⲧⲃⲁⲃⲩⲗⲱⲛ ⲁϥⲧⲁⲁϥ ⲉⲟⲧⲡϥ ⲉϩⲟⲩⲛ ⲉⲡⲙⲁ ⲛⲥⲓⲕⲉ ϣⲁ ⲡⲉϩⲟⲟⲩ ⲉⲛⲧⲁϥⲙⲟⲩ ⲛϩⲏⲧϥ 12ⲁⲩⲱ ϩⲣⲁⲓ ϩⲙ ⲡⲙⲉϩⲛϯⲟⲩ ⲛⲉⲃⲟⲧ ⲛⲥⲟⲩⲙⲏⲧ ⲙⲡⲉⲃⲟⲧ ⲁϥⲉⲓ ⲛϭⲓ ⲛⲁⲃⲟⲩⲍⲁⲣⲇⲁⲛ ⲡⲁⲣⲭⲓⲙⲁⲅⲓⲣⲟⲥ ⲉⲧⲁϩⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲉϩⲣⲁⲓ ⲉⲑⲓⲏⲙ 13ⲁϥⲣⲱⲕϩ ⲙⲡⲏⲓ ⲙⲡϫⲟⲉⲓⲥ ⲙⲛ ⲡⲏⲓ ⲙⲡⲣⲣⲟ ⲙⲛ ⲛⲏⲓ ⲧⲏⲣⲟⲩ ⲛⲧⲡⲟⲗⲓⲥ ⲁⲩⲱ ⲛⲟϭ ⲛⲓⲙ ⲛⲏⲓ ⲁϥⲣⲟⲕ ϩⲟⲩ ϩⲛ ⲟⲩⲥⲁⲧⲉ 14ⲁⲩⲱ ⲥⲟⲧⲃ ⲛⲓⲙ ⲉⲧⲕⲱⲧⲉ ⲉⲑⲓⲏⲙ ⲁⲥϣⲣϣⲱⲣⲟⲩ ⲛϭⲓ ⲧϭⲟⲙ ⲧⲏⲣⲥ ⲛⲛⲉⲭⲁⲗⲇⲁⲓⲟⲥ ⲧⲁⲓ ⲉⲧϣⲟⲟⲡ ⲙⲛ ⲡⲁⲣⲭⲓⲙⲁⲅⲉⲓⲣⲟⲥ 15 16ⲁⲩⲱ ⲁϥϣⲱϫⲡ ⲙⲡⲥⲉⲉⲡⲉ ⲙⲡⲗⲁⲟⲥ ⲛϭⲓ ⲛⲁⲃⲟⲩⲍⲁⲣⲇⲁⲛ ⲉϩⲉⲛϭⲙⲏⲩⲉ ⲙⲛ ϩⲉⲛⲟⲩⲉⲓⲉ 17ⲁⲩⲱ ⲛⲉⲥⲧⲩⲗⲟⲥ ⲛϩⲟⲙⲧ ⲉⲧϩⲙⲡⲏⲓ ⲙⲡϫⲟⲉⲓⲥ ⲙⲛ ⲛⲃⲁⲥⲓⲥ ⲙⲛ ⲧⲉⲑⲁⲗⲁⲥⲥⲁ ⲛϩⲟⲙⲧ ϩⲙ ⲡⲏⲓ ⲙⲡϫⲟⲉⲓⲥ ⲁⲩⲟⲩⲟϣϥⲟⲩ ⲛϭⲓ ⲛⲉⲭⲁⲗⲇⲁⲓⲟⲥ ⲁⲩϫⲓ ⲡⲉⲩϩⲟⲙⲧ ⲉϩⲣⲁⲓ ⲉⲧⲃⲁⲃⲩⲗⲱⲛ 18ⲁⲩⲱ ⲧⲥⲧⲉⲫⲁⲛⲏ ⲙⲛ ⲛⲉⲫⲓⲁⲗⲏ ⲙⲛ ⲛⲉⲕⲣⲁⲩⲣⲁ ⲙⲛ ⲛⲉⲥⲕⲉⲩⲟⲥ ⲧⲏⲣⲟⲩ ⲛϩⲟⲙⲧ ⲉⲧⲟⲩϣⲙϣⲉ ⲛϩⲏⲧⲟⲩ 19ⲙⲛ ⲛϣⲟⲩⲣⲏ ⲙⲛ ⲛⲗⲩⲭⲛⲓⲁ ⲙⲛ ⲛⲉⲑⲩⲥⲕⲏ ⲙⲛ ⲛⲟⲩⲟⲧϩ ⲛⲉϩⲛⲁⲁⲩ ⲛⲉⲓⲉⲡ ⲛⲟⲩⲃ ⲉⲩⲟ ⲛⲛⲟⲩⲃ ⲧⲏⲣⲟⲩ ⲁⲩⲱ ⲛⲉⲧⲟ ⲛⲉⲓⲉⲡ ϩⲁⲧ ⲉϩⲉⲛϩⲁⲧ ⲧⲏⲣⲟⲩ ⲛⲉ ⲁϥϫⲓⲧⲟⲩ ⲛϭⲓ ⲡⲁⲣⲭⲓⲙⲁⲅⲉⲓⲣⲟⲥ 20ⲁⲩⲱ ⲡⲉⲥⲧⲩⲗⲟⲥ ⲥⲛⲁⲩ ⲙⲛ ⲧⲉⲑⲁⲗⲁⲥⲥⲁ ⲙⲛ ⲡⲙⲛⲧⲥⲛⲟⲟⲩⲥ ⲙⲙⲁⲥⲉ ⲛϩⲟⲙⲧ ⲉⲧϩⲁⲣⲟⲥ ⲛⲧⲉⲑⲁⲗⲁⲥⲥⲁ ⲛⲁⲓ ⲉⲛⲧⲁⲡⲣⲣⲟ ⲥⲟⲗⲟⲙⲱⲛ ⲧⲁⲙⲓⲟⲟⲩ ⲉⲕⲁⲁⲩ ϩⲙ ⲡⲏⲓ ⲙⲡϫⲟⲉⲓⲥ ⲉⲙⲙⲛ ϣⲓ ϣⲟⲟⲡ ⲙⲡⲉⲩϩⲟⲙⲧ 21ⲁⲩⲱ ⲛⲉⲥⲧⲩⲗⲟⲥ ⲛⲉϥⲟ ⲛⲙⲁⲃⲧⲏ ⲙⲙⲁϩⲉ ⲛϫⲓⲥⲉ ⲉⲡⲟⲩⲁ ⲡⲟⲩⲁ ⲁⲩⲱ ⲟⲩϩⲱⲥ ⲉϥⲛⲁⲣⲙⲛⲧⲥⲛⲟⲟⲩⲥ ⲙⲙⲁϩⲉ ⲡⲉ ⲡⲉϥⲕⲧⲟ ⲉⲣⲟϥ ⲉⲣⲉⲡⲉϥⲟⲩⲙⲟⲧ ⲛⲁⲣϥⲧⲟⲟⲩ ⲛⲧⲏⲏⲃⲉ ⲉϥⲕⲱⲧⲉ 22ⲉⲣⲉⲟⲩⲧⲟⲩⲁ ⲛϩⲟⲙⲧ ϩⲓϫⲱⲟⲩ ⲉⲣⲉϯⲟⲩ ⲙⲙⲁϩⲉ ⲛϣⲓⲏ ϩⲓ ⲧⲡⲉ ⲙⲡⲉⲧⲟⲩⲁ ⲁⲩⲱ ⲟⲩⲙⲟⲩⲛⲅ ⲛϣⲛⲉ ⲙⲛ ϩⲉⲛⲙⲟⲩⲛⲅ ⲛϩⲉⲣⲙⲁⲛ ϩⲓϫⲙ ⲡⲉⲧⲟⲩⲁ ⲉⲩⲕⲱⲧⲉ ⲉⲣⲟϥ ⲉϩⲉⲛϩⲟⲙⲧ ⲧⲏⲣⲟⲩ ⲛⲉ ⲕⲁⲧⲁ ⲛⲁⲓ ⲟⲛ ⲛⲉⲩϣⲟⲟⲡ ⲡⲉ ⲙⲡⲙⲉϩⲥⲛⲁⲩ ⲛⲥⲧⲩⲗⲟⲥ ⲉⲩⲛϣⲙⲟⲩⲛ ⲛϩⲉⲣⲙⲁⲛ ϣⲟⲟⲡ ⲉⲡⲙⲁϩⲉ ⲙⲡⲙⲛⲧⲥⲛⲟⲟⲩⲥ ⲙⲙⲁϩⲉ 23ⲉⲩⲛ ⲡⲥⲧⲁⲉⲓⲟⲩⲧⲁⲥⲉ ⲛϩⲉⲣⲙⲁⲛ ϩⲛ ⲟⲩⲥⲁ ⲛϩⲉⲣⲙⲁⲛ ⲇⲉ ⲧⲏⲣⲟⲩ ⲉⲧϩⲓϫⲛⲡⲉϣⲛⲉ ⲙⲡⲉϥⲕⲱⲧⲉ ⲥⲉⲉⲓⲣⲉ ⲛϣⲉ 24ⲁⲩⲱ ⲁϥϫⲓ ⲛϭⲓ ⲡⲁⲣⲭⲓⲙⲁⲅⲉⲓⲣⲟⲥ ⲛⲥⲁⲣⲁⲓⲁⲥ ⲡϣⲟⲣⲡ ⲛⲟⲩⲏⲏⲃ ⲙⲛ ⲥⲟⲫⲟⲛⲓⲁⲥ ⲡⲉⲧⲟ ⲛⲡⲙⲉϩⲥⲛⲁⲩ ⲛⲟⲩⲏⲏⲃ ⲙⲛ ⲡϣⲟⲙⲧ ⲉⲧⲁⲣⲉϩ ⲉⲧⲉϩⲓⲏ 25ⲙⲛ ⲟⲩⲥⲓⲟⲩⲣ ⲡⲉⲧⲟ ⲛⲉⲡⲓⲥⲧⲁⲧⲏⲥ ⲉϫⲛ ⲛⲣⲱⲙⲉ ⲉⲧⲙⲓϣⲉ ⲙⲛ ⲥⲁϣϥ ⲛⲣⲱⲙⲉ ⲛⲁⲓ ⲉⲧⲟ ⲛⲣⲙⲛⲥⲟⲉⲓⲧ ⲙⲡⲉⲙⲧⲟ ⲉⲃⲟⲗ ⲙⲡⲣⲣⲟ ⲉⲁⲩϭⲛⲧⲟⲩ ϩⲛ ⲧⲡⲟⲗⲓⲥ ⲁⲩⲱ ⲡⲉⲅⲣⲁⲙⲙⲁⲧⲉⲩⲥ ⲛⲛϭⲟⲙ ⲉⲧⲥϩⲁⲓ ⲛⲥⲁ ⲡⲗⲁⲟⲥ ⲛⲧⲉ ⲡⲕⲁϩ ⲁⲩⲱ ⲥⲉ ⲛⲣⲱⲙⲉ ⲉⲃⲟⲗ ϩⲙ ⲡⲗⲁⲟⲥ ⲙⲡⲕⲁϩ ⲛⲉⲛⲧⲁⲩϩⲉ ⲉⲣⲟⲟⲩ ϩⲛ ⲧⲙⲏⲧⲉ ⲛⲧⲡⲟⲗⲓⲥ 26ⲁϥϫⲓⲧⲟⲩ ⲛϭⲓ ⲛⲁⲃⲟⲩⲍⲁⲣⲇⲁⲛ ⲡⲁⲣϫⲓⲙⲁⲅⲉⲓⲣⲟⲥ ⲁϥⲛⲧⲟⲩ ϣⲁ ⲡⲣⲣⲟ ⲛⲧⲃⲁⲃⲩⲗⲱⲛ ⲉϩⲣⲁⲓ ⲉⲇⲉⲃⲗⲁⲑⲁ 27ϩⲙ ⲡⲕⲁϩ ⲛⲉⲙⲁⲑ 28 31ⲁⲥϣⲱⲡⲉ ϩⲛ ⲧⲙⲉϩⲙⲁⲃ ⲥⲁϣϥ ⲛⲣⲟⲙⲡⲉ ⲛⲧⲉⲣⲟⲩⲡⲱⲱⲛⲉ ⲉⲃⲟⲗ ⲛⲓⲱⲁⲕⲓⲙ ⲡⲣⲣⲟ ⲛⲓⲟⲩⲇⲁ ϩⲙ ⲡⲙⲉϩⲙⲛⲧⲥⲛⲟⲟⲩⲥ ⲛⲉⲃⲟⲧ ϩⲛ ⲥⲟⲩϫⲟⲩⲧ ⲁϥⲧⲉ ⲙⲡⲉⲃⲟⲧ ⲁϥϫⲓ ⲛϭⲓ ⲟⲩⲗⲉⲙⲁⲇⲁⲭⲁⲣ ⲡⲣⲣⲟ ⲛⲧⲃⲁⲃⲩⲗⲱⲛ ϩⲛ ⲧⲉⲣⲟⲙⲡⲉ ⲉⲛⲧⲁϥⲣⲣⲣⲟ ⲛϩⲏⲧⲥ ⲛⲧⲁⲡⲉ ⲛⲓⲱⲁⲕⲉⲓⲙ ⲡⲣⲣⲟ ⲛⲓⲟⲩⲇⲁ ⲁϥⲛⲧϥ ⲉⲃⲟⲗ ϩⲙ ⲡⲏⲓ ⲉⲧⲟⲩϩⲁⲣⲉϩ ⲉⲣⲟϥ ⲛϩⲏⲧϥ 32ⲁϥϣⲁϫⲉ ⲛⲙⲙⲁϥ ⲛϩⲉⲛϣⲁϫⲉ ⲉⲛⲁⲛⲟⲩⲟⲩ ⲁⲩⲱ ⲁϥⲕⲱ ⲙⲡⲉϥⲑⲣⲟⲛⲟⲥ ϩⲓϫⲛ ⲛⲉⲑⲣⲟⲛⲟⲥ ⲛⲛⲉⲣⲣⲱⲟⲩ ⲉⲧϣⲟⲟⲡ ⲛⲙⲙⲁϥ ϩⲛ ⲧⲃⲁⲃⲩⲗⲱⲛ 33ⲁⲩⲱ ⲁϥϣⲓⲃⲉ ⲛⲧϩⲉⲃⲥⲱ ⲉⲧϩⲓϫⲱϥ ϩⲙ ⲡⲉϣⲧⲉⲕⲟ ⲁⲩϯⲕⲉⲧⲉ ϩⲓⲱⲱϥ ⲁⲩⲱ ⲛⲉϥⲟⲩⲱⲙ ⲙⲡⲉϥⲟⲉⲓⲕ ⲡⲉ ⲛⲥⲏⲩ ⲛⲓⲙ ⲙⲡⲉϥⲙⲧⲟ ⲉⲃⲟⲗ ⲛⲛⲉϩⲟⲟⲩ ⲧⲏⲣⲟⲩ ⲉⲛⲧⲁϥⲱⲛϩ ⲛϩⲏⲧⲟⲩ 34ⲁⲩⲱ ⲡⲉⲧⲧⲏϣ ⲛⲁϥ ⲙⲛ ⲡⲣⲣⲟ ⲛⲧⲃⲁⲃⲩⲗⲱⲛ ⲛⲉⲩϯ ⲙⲙⲟϥ ⲛⲁϥ ⲛⲥⲛⲏⲩ ⲛⲓⲙ ⲉⲃⲟⲗ ϩⲛ ⲟⲩϩⲟⲟⲩ ⲉⲩϩⲟⲟⲩ ϣⲁ ⲡⲉϩⲟⲟⲩ ⲉⲛⲧⲁϥⲙⲟⲩ ⲛϩⲏⲧϥ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉϥⲱⲛϩ
Copyright information for
CopSahBible2